Comme te po' 'mpurta'
'e chello ca te sta attuorno
si saje
ca tra 'na semmana
vide Napule?
'O core te sbatte,
ll'uocchie
te rideno
mentre se 'nfonnono
'e lacreme.
04-06-1999
20:15
Che me ne 'mporta
s'io sto' chiagnenno
mentre cammino
'nmiezo a tanta gente.
Chiagno felice
mentre 'o core canta
l'evera 'e mare
e 'a quiete
'e 'na marina.
Che me ne 'mporta
si me vedite 'e chiagnere,
che me ne 'mporta
'e chello ca penzate:
songo felice,
nun capisco niente,
pecchè dimane,
'o ssaje?,
io veco Napule.
08-06-1999
07:30
Napule aspietteme.
'O ssaje ca sto' partenno?
Fatte truva'
vestuta
dell'abbito cchiù bello.
T'aggio ammira'
e voglio rimmane'
'ncantato.
Comme 'ncantato
se guarda 'a 'nnammurata.
08-06-1999
07:40
Napule
t'aggio vista
sulo pe' 'nu mumento
ca m'è parso
'n'eternità.
T'aggio sentuta
dint'all'aria.
T'aggio vasata
Napule.
T'aggio lassata.
14-06-1999
06:55
Quanno se lassa Napule
te siente 'e veni' meno
dint''o core.
Siente ca 'na catena
te 'ntrattene.
Vulisse allucca',
pe' te fa' senti'
d''a gente,
ca nun vuo' parti'.
Quanno se lassa Napule.
