Seven Pages of Poetry Poetry in Urdu

These are the verses that I wrote while chatting on the net spontaneously. Though English letters are used here yet the verses are in Urdu, my native language. After these verses that I wrote on chat that comprise a part of this page, there is other of my poetry mostly on HEJAB & current matters. Six other pages of my Urdu poetry are linked with this page that have Urdu letters too for their content.

Muhammad Saleem Dada


Al-Hamdu-Lillah

CHAT KI SHAIERY

Started at 08-05-2003

Allah meri baat main zor aisa bana dey
jo bhee main kahoon baat woh duniya ko saja dey
muslim tu agar hai to zara hosh main rehna
hum pay yeh jo waqt aaya hai bay hadd woh kara hai
sunnay ka koi baat magar hausla rakho
leader jo bara hai woh ana hi pay ara hai
kitnay hee tazadaat nazar aa bhi rahay hain
khatay hain ghame qaum unhain kha bhi rahe hain
duniya bhi isi chat kay kamray hee ki see hai
aatay hain kai aur kai ja bhi rahe hain
duniya main agar aayen hain to hans kay jiyen gay
ronay kay liyay mere elawa bhi buhat hain
batain to chalee jatee hain ab aur taraf main
rakht apna uthaya hai chalay ghar ki taraf hum

abhee bus naak say neechay nahin dekho yaaro
yaha'n karnay ko paree hain na jaha'n kee batain
tujhe bus aik baharon kee pari hai wa'ez
zara sardee kee bata kar lay khiza'n kee batain
saman baikaar ki baton main jamana kaisa
jahan dil khwar ho wan dil ko lagana kaisa
tumhain apni hee pari hai jahan dooja dekho
kitnay logon ka hai chehra yahan soojha dekho
main nai dekha hai buhat chat main ja ja kar bhi
mujhay duniya kee samajh aati nahin kiya dekhoon
yeh muhabbat kay fasanay yeh kahani choro
meri chahat hai tujhe duniya sajata dekhoon
tujhe duniya nay to samjha hai nira nakaara
aray main kaash tujhe hansta hansata dekhoon

so u leave all rubbish haan karo ilmi batain
inhi batoon say mujhe aaj tasalli hogi
main to khojee hoo'n rahe gum ka baray arsay say
abhee bus keh day mujhe aaj tasalli hogi
zindagi choti sahi hans kay guzaro isko
yoon to ronay say bhi har waqt guzar jaata hai
hamain miltay hee raho aisay sabhi khoobi say
bhalay akhlaq say hur kaam sanwar jaata hai
hamain dil say bhi nahin koi shikayat yaaro
go kay is chat main usnay hamain laa phenka hai
kaisay khud garz hain kay apni kahay jaatay hain
is nay bakwaas kee to us nay bhi kiya phenka hai

buray andaz liyay jateen hain teri baatain
nahi'n tazeem ka andaaz tujhe rakhna hai
main jo likhta hoon mera haath hai mere mun par
abhi kanon pay mera haath mujhay rakhna hai
tumhe samjahnay nahin aaya hoon
so main baitha hoon abhi jaanay nahin aaya hoon
mujhay andaaz mere jinay do
jiyo khud aap magar aur mujhe jinay do

sher goee ka mujhe yaro bara hi shauq hai
sher kehna mein samajhta hoon kay aala zauq hai
sher main baten kai hoti hain thoray lafz main
jin kay kehnay keliyay daftar kai darkar hain
baith kay gum sher main hain dil bahlta hai yaheen
sher hi ab rah gaya hai baqi hum bekaar hain
hum kay tehray shairee may mast our ghoomay howay
hum say to yara koi panga na lena tum yaha'n
baat say chalti hain batein bhi kai aur sab nai
baat sub achi si karna kay rahe acha sama'n

zamanay bhar kee batein kar rahe ho
kabhi tum aap hee ko bhi to dekho
jabhi insaan ho to taur seekho
nahin andaaz-e haiwan aur daalo
chalo saaki ko apnay do sadaein
chalo phir jaam ka ik daur daalo
yahan paani main kaisi taazgi hai
agar shak hai to ismai'n paur daalo
chalay chalta rahay yeh jaam saaqi
jahan par khatm ho to aur daalo
meri masti main mein to jhoomta hoon
so mai yaan aur daalo faur daalo
meri baaton ko sunkay mu'n na phero
zara tehro yaha'n pay ghaur daalo
magar kehte to ho khud ko parha likha sabhi tum
jab aisa hai to phir andaaz apnay aur daalo

kaisi duniya ho gayee kay hur badi ab aam hai
aadmi bikta hai aur thora hee uska daam hai
aa chalain dhoondain kahin pay roshni kee bhi khabar
yaan pay parwaano ka tehra na hee mera kaam hai

chor do batein karain ab shaeiry say mail hum
sub main peechay rah gaye hain is main na ho'n fail hum
kaun janay kab jaha'n main zindagi kee shaam ho
kab talak khailain gay jaanay zindagi ka khel hum

baat karni hai to piyari see karo na baat bhi
din bhi acha hi rahe ga aur achi raat bhi
hum kay dekhein sham kay mausum ka yaro intizaar
isqadar paatay hain acchay husn kay auqaat bhi
aur lekin is kee khatir shart bhi aklaaq hai
woh jo hoga khoobsoorat hogi teri zaat bhi
phir tumhari apni marzi jaisay chaho tum jiyo
par yahan pay keh to dee hai main nay sacchi baat bhi

zindagi kee sham ko ja ke yeh jaana kaun hoon
ab to rehmat pay khuda hee ki to hai marna mujhe
garq uski yaad main rehnay ki khawish ho gai
bus yehi karna hai baaqi phir nahin karna mujhe
chal chalen dil roshni mil jayegi phir aur bhi
hum say parwaanay jo tehrain aur to accha nahin

kuyon kisi ki chat main tangain aranay main lagoon
pee to mere yaar nay hai larkharanay main lagoon

baat karnay aa gya hai is giray akhlaq main
baithnay kay bhi nahin qabil tu is autaq main
zindagi hai kiya yeh jaano baqi sub bekaar hai
dil say sacchai ko maano baqi sub bekaar hai
phir kisi ki yaad main hum to pareshan ho gaye
aisee tanhai main rehna baar hai to kya karain
hum nay jaana hi nahin tha chup rahay accha kiya
ab jo tere dil main mera pyar hai to kiya karain
jaam bhartay hi rahen gay chaq jo saqi rahe
phool khiltay bhi rahen gay baagh jo baaqi rahe

zindagi ko jo pukara maut nay awaz di
zindagi ki maut tehri doosri pehchaan hai
aadmi buzdil rahe to aadmi kis kaam ka
jo bahadur hai wohi insaan aali-shaan hai
dekh lena phir uthoon ga peechay to rehna nahin
gir kay khoobi say shanbalna bhi meri pehchaan hai
zindagi to hai magar kuch aur bhi to chahiyay
zindagi ko dhalnay ka taur bhi to chahiyay

main nay zindagi ko jub say zara paas jaa kay dekha
mere dil main bus gaya hai gham o dard hur kisi ka
kahan zindagi kay khailay kahan aadmi khilona
meri koshishen to hoon gi magar hoga hai jo hona
mera host bhi ajab hai nira urdu say nirala
main nay shairy likhi to mujhay room say nikala
yahan dar bhi lag raha hai karain kaise apni baatain
abhi shaeiry karain to kahin par na jain latain
zindagi ka waqt aisay ja raha hai daur kar
jaisay paani ban rahi ho barf koi dhoop main

na hee angrezi durust aur na hi urdu saaf hai
chat main angrezi adhee jabkay urdu half hai
sub haqiqat rehnuma kee khol kay batla gaya
baat sacchi kar gaya go aadmi woh gaaf hai

jabhee koee bolay na sochay na samjhay
to jano siyasat main woh jaa raha hai
hamari siyasat bhi aisi hai logo
kay yaan pay jo hai galiya'n kha raha hai
jo mota hai uskee to moti samajh hai
kay dubla bhi hankay chala ja raha hai

zindagi main woh bulandi mil sakay kay phir talab koi na ho
khud ko pehchanoon barabar kay ajam ya phir arab koi na ho
zindagi ki baat main muzmir hai baatain maut ki
par yahan kitnay hain jo samjhain gay batain maut ki

gul joro gay jo gul say sajay ga yeh zamana
gun gata tum-haray hee rahay ga yeh zamana
insaan ko insaan bananay kee karo tum
insaan banay ga to banay ga yeh zamana
socho nahin tum aur karo dil say bhalai
jitna bhi bhalay hogay phalay ga yeh zamana
aapas main laro gay to raho gay na kahin kay
hum hee na rahe kaisay chalay ga yeh zamana
baatil pay na jana na kabhi larna kisi say
baatil say bari jald laray ga yeh zamana
kaanton ko chuno phool to sub he nay samaitay
kub ja kay khusi ghum ko kahay ga yeh zamana
na darta hoon dunia say na duniya ki talab hai
aakhir kya mrey saath karay ga yeh zamana

sham say pehlay na jaana shaam ko aanay to do
jub kiya aaghaz to anjaam ko aanay to do
aur mera zarf dekho gay zara tehro na tum
saqi heran ho rahe ga jaam ko aanay to do
main bacha hoon phir kisi sayyaad say yaaro abhi
dekh loon ga phir kisi kay daam ko aanay to do
phir koi andaaz leke baam say utroon ga main
pehley charnay do mujhe so baam ko aanay to do
mere peechay hee pare hain istareh se aap kuyun
hur bhalai mein sabhee ke naam ko aanay to do
ab subuh hai kaam hai kitna mujhe yaan shaam tak
phir chala aaoon ga lekin shaam ko aanay to do

mujhe aaj youn laga hai bara farq hai hamara
tujhe naam ki pari hai mujhe dil nay hai pukara
sabhi youn to chal rahe thay rawan qaafla tha saara
kisi nay to paee manzil koi raastay main hara
kabhi naaz bhi na karna tere husn pay tu yaara
isay waqt na rakhay ga jisay tu nay hai sanwara
bahay khoob jaa raha hai teri zindagi ka dhara
magar asr bhi to hogi go abhi bajay hain baara
yaheen pay sabhi kharay hain magar hai juda nazara
kise nay zamee'n ko dekha kisi ko dikha sitara

kahan tum ho kay kaha jo bhi alam tum ko mila
kahan main hoon kay mera dard jigar hee may raha
kahan tum ho kay samaitay ho khushi kay sama'n
kahan main hoon kay sada zair o zabar hee main raha
kahan tum ho kay khila koi chaman ho jaisay
kahan main hoon kay sada khoje shajar hee main raha
kahan tum ho kay sabhi kuch to para hai dar pay
kahan main hoon kay dafe ranj o zarrar hee main raha
kahan tum ho kay mili chand qadam par manzil
kahan main hoon kay bari umr safar hee main raha

MUHAMMAD SALEEM DADA

e-mail:     saleemdada@yahoo.com

Poetry-Page1
Poetry-Page2
Poetry-Page3
Poetry-Page4
Poetry-Page5
Poetry-Page6

From here are my verses that I did not write at chat.

AGAR CHAHE RAB

agar chahe Rab aaj qae?l mei'n hoo'n ga
kabhi jahelo'n mai'n na shamil mei'n hoo'n ga
yeh zarqa say kehnay kay qabil mei'n hoo'n ga
na mae?l karoo'n ga na mae?l mei'n hoo'n ga
bacha kay chaloo'n aap ko har badi say
isi baat ka aik sae?l mei'n hoo'n ga
zamana bura hai so baandho girah tum
kisi ki ada say na mae?l mei'n hoo'n ga
jabhi rah apni mei'n chun hee chuka hoo'n
kisee rastay pay na aamil mei'n hoo'n ga


ZALZALAY KAY BAAD

hum chalay aaye hai'n aisay zindagi kay mor par
kay jaha'n par imteha'n sangeen hoga aur bhi
dekhna hai behteri hoti bhi hai ya kay nahi'n
kay jaha'n behter ya phir rangeen hoga aur bhi
hur bari takleef aati hai sikhanay kay leeye
kiya baro'n kee to bhala tauheen hoga aur bhi
chahay isko tum bana lo qeher ya phir imtiha'n
jald wazeh waqt say yeh seen hoga aur bhi
zalzalay mai'n janay walay apnay eema'n par gaye
par tera kamtar ya behtar deen hoga aur bhi
aaj hee apnay gunaho'n ka madava keejeye
intizaar e hadisa o zalzila na keejeye

HAMARAY HUSPITAAL
(8th Jan. 2006 - night of 8th Zilhaj)


kaisay ajab hai'n aaj sehet kay yeh idaray
bantai'n shifa to chor dai'n aqdaar yeh saaray
aurat kee masihaee ko tehrey hai'n na-mehram
aisay mai'n kaha'n jaoo'n mai'n takleef kay maaray
ab hum ko nahi'n khoj saharo'n kee maseeha
mar jaye'n gay mangai'n gay nahi'n aisay saharay
kuch reh to sakai'n sharm o hiya kay bhi taqazay
aakhir kyoo'n sabhi koee kisi khail mai'n haray
afsos meri qaum ko samjha nahi'n sakta
mehdi ko abhi bhej day ya Rub mere Yaaray
______________________________________________________________


HAZRAT HUSSAIN KEE SHAHADAT
(Ashura at 2006)


hamai'n roko gay sahih raah say par jayai'n gay
nahi'n aisay kay kisi zulm say dar jayai'n gay
hamai'n Islam pay jeenay jo nahi'n daitay ho
baray deewanay hai'n Islam pay mar jayai'n gay
jabhee dee'n kay hai'n sipahee tabhee darna kaisa
hamai'n maloom hai is raah main sar jayai'n gay
kaee pehlay bhee to hotay thay wafa kay paikar
hamai'n taufiq hoee hum bhi yoo'n kar jayai'n gay
humai'n marna hai so phir maut say darna kaisa
abhee aa jaye sukoo'n hee say to ghar jayai'n gay

RAASTA


kaisay qaboo pawo gay chehko na aisay daam par
jeeney jo na do gay to mar jayai'n gay Islam par
zinda hai'n to isliyay kay jannati ho kar chalai'n
ab sahar mai'n woh karai'n gay jo rakha tha shaam par
din mai'n neend aanay lagi thee khoob jhanjora mujhe
kaam say janay laga tha phir laga hoo'n kaam par
kyu'n woh tehray umr bhar jo kaam aa jaye abhi
kyu'n banay samaan ko turjeeh na day khaam par

KABHI RO BHI LIYA KAR

dil hai ya koi dhaat kabhi ro bhi liya kar
khiffat kee nahi'n baat kabhi ro bhi liya kar
din kitnay dhalay aur kisi khel mai'n khailay
dhaltee hai bari raat kabhi ro bhi liya kar
hur waqt hansi khel to acha bhee nahi'n hai
bhool apni na auqaat kabhi ro bhi liya kar

KITNA GIRAY GEE TU

aap zan yeh keh rahee hai jo hiya thee kho gayee
sharm kee aisee kee taisee jo gayee hai so gayee
aur kitna tu giray gee yeh bata dey aaj tu
kitna choray gee hiya tu aur apni laaj tu
mard ka yeh kaam hai kay zulm say woh dour ho
mard ka zewar hai kay woh zakhm say bhi choor ho
pur subhi kamo'n say pehley dekhnee hai laaj bhee
daurna hoga yaha'n yousuf kee manind aaj bhee
jab taqaza dil ka hai to rung bhee wo laaye ga
dekhna is kee hiya say mard rasta paaye ga


MAGHRIB SAY DO BATAIN

aurat kee kasish theek hai mehsoos karai'n hum
aisay bhee nahi'n thaam kay dil us pay marai'n hum
bigrai'n gay na jazbaat say maghrib teri khaatir
rastay ko na chorai'n gay bhalay maut marai'n hum
aurat kay tanazzul ko samajhta hai taraqqi
baatai'n to bari karta hai ab sun jo karai'n hum
mashriq pay yeh ilzaam ghulami mai'n hai aurat
jabkay usay maghrib mai'n jo dekhain to darai'n hum
kehta hai kay aurat kay taqaddus ko bhula do
chahat yehi karta hai badi us pay dharai'n hum
nekee ko barha dei'n gay to baatil bhee mitay ga
maghrib kee bura'ee ka sila kaahe bharai'n hum
shaadi kay bina koee na do-sheeza milay gee
do teen karai'n aur agar jald karai'n hum
mei'n sar pay rakhoo'n ga na zamee'n par hee rakhoo'n ga
woh dil say bani hai so wahee'n par hee rakhoon ga

AAP KEE TALEEM SAY
(11 April, 2006 i.e 12 Rabi-ul-Awwal)

zor aawar tha nabee mei'n aap kee taleem say
jaag uttha phir abhee mei'n aap kee taleem say

ghair to kehtey hai'n kay woh aam say insaan hain
ab kahoo'n ga aap kee mei'n aap kee taleem say

kiya mujhe behka'e gee duniya kee batai'n ya hansee
jaan leta hoo'n sabhee mei'n aap kee taleem say

na mei'n chahoo'n ga kabhee kuch aaj hee jo kar saka
zindagi sub aap see mei'n aap kee taleem say

phir sukoo'n say so sakoo'n ga dekh loo'n ga jo yaha'n
jagmagati chaandni mei'n aap kee taleem say

CHUPAY ASRAT

maana kay asar aik chupi baat rakhay hai
yeh kiya kay parhoo'n roz kay din kaisa rahay hai

rokoo'n ga nahi'n kaam ko jo waqt kara ho
accha ho jabhee kaam to kiya waqt karay hai

Allah kay karnay say hee sab hota hai raahi
baaqi to waseelay hai'n jaha'n aisay chalay hai

kirdar dikhanay ka waseela to hai gardo'n
aagay kee koee baat kaha'n kaun kahay hai

nayyer ho qamar ho kay sitaray ho'n yeh roshan
Allah kee makhlooq hai sub Uskee kahay hai

TERRORISM

jo kisi ko bewaja maray so woh insaa'n nahi'n
aisay logo'n ko zara sa koee paas-e-jaa'n nahi'n
saath woh bhee hai'n jo taaqat kay nashay mai'n choor hain
jaanwar hai'n zulm kay khoogar hai'n nuktay-daa'n nahi'n
maar mera bhaee so maaroo'n ga teray bhaee ko
yeh kaha'n insaaf hai kiya tu koee haiwaa'n nahi'n
lohay tanbay nay taraqqi khoob kee hai dekh lo
haaye kay aisee tarraqqi mai'n magar insaa'n nahi'n
is taraf terror hai tehra us taraf terrorism
aadmi kaisay jiyay kay jeenay ka saamaa'n nahi'n
jab jaha'n apna mafad aaya usoolee na rahay
is waja say dard bhee hai dard ka darmaa'n nahi'n

HEJAB

ghaur farmaaye'n kabhee to husn aur is baat mai'n
chaand poora ho gaya to woh dikha bus raat mai'n
kaan mai'n heeray hai'n to woh chup kay baithay hai'n waha'n
aap hai baitha chupa kay husn hai jis dhaat mai'n
aab mai'n gehraee mai'n aur seep main hai'n motia'n
husn Rub nay jo chupaya to hai pardo'n saat mai'n
aap nay kuyoo'n chun liya hai be-hejabi ko abhee
saaf balkay keejeye jo hai badee aalat mai'n
baat na samjhai'n to mere paas to na aayeeyay
haal kaisay mai'n kahoo'n kay sharm bhi hai baat mai'n
aap aurat hai'n alaamat husn kee bhee aap hai'n
dhoondhyay na phir hejab-e husn apnee zaat mai'n


EHSAAS
(19th June 2006)

isi mushkil mai'n hee mehfil ko jamana seekho
jaha'n kaisa hee bigarta ho banana seekho
abhee hur aik gulista'n pay khiza'n chaee hai
bahar aaye to sabhee phir say sajana seekho
jaha'n ehsaas-e-ghulami ho uthana sar ko
milay sardaari to phir sar ko jhukana seekho
hamai'n medaa'n mai'n bulata hai kay beemari hai
isay kharish hai ilaaj iska purana seekho
mujhe kehta hai mera dil kay ujaala hoga
zara dil kee wohi baato'n ko sikhana seekho


PAISA
(07-07-2006)

subh ko jama kiya tha kay maghrib pay mar gaye
paisa bara hai unka magar woh kidhar gaye
kitna ajeeb haal hai logo'n ka dekheyay
paisay kay aur naam kay peechay bikhar gaye
teacher ho chahe mulla ho chahe tabeeb ho
paisay kee boo jo soonghee to saaray udhar gaye
hum ko zarooriat jo miltee sukoo'n say hain
Allah tera shukr hai kay hum sudhar gaye
mehfil mai'n unkay aanay kee jo mil gayee khabar
jaanay ka koee qasd hee na tha magar gaye
mai'n nay kafan mai'n jaib nahi'n dekhee hai kabhee
jo saath hee gaye hai'n woh qalb o nazar gaye

AAJ KEE JANG

kehtee hai zamee'n,koh,falak,paani o wa-dee
duniya mere Allah kee hai sun lay fasa-dee
nafrat kee kahanee ka to anjaam chala tha
nadaani say tum nay woh magar phir say suna dee
ab jo bhee chalee jang so woh khatm na ho gee
woh chaltee chalee jaye gee jo tum nay chala dee
kabul ho ya baghdad ho ya arze falastee'n
barso'n nay kaha'n aag bhari jang bujha dee
hum nay jo banaaya tha muhabbat ka jaha'n tha
tum nay to yaha'n barh kay magar aag laga dee
pehlay jo kabhee jang thee insaan lara tha
ab andhee machine'n hain aur insaan muna-dee
insaan to dushman ko bhee deta hai rea'yat
pur andhee machinoo'n nay rawadaaree bhula dee
keh day gee bari jald yahudee pay yeh duniya
dekho isay Allah nay kaisee yeh saza dee
insha Allah

HARKATAI'N
(29th Aug.2006)

hatho'n mai'n asa tehra na bato'n main asar hai
aansoo bhee bahe to hai'n baha khoon-e-jigar hai
behka jo kabhee mard tabhee fard hee behka
aurat kay bigarnay say bigar jaata nagar hai
taleem bhee aala hai magar harkatai'n aisee
tere pay woh thookay ga jisay teri kahabar hai
karna jo bhala hai to na-mehram say zara bach
us pay jo nazar aatee hai shaitanee nazar hai
parday ko na chorai'n kay hiya kee hai nishaani
dil ka jo sukoo'n hai so isee mai'n hai idhar hai

PAIGHAAM
(25th Sep.2006; 1st Roza)

dhalnay jo laga din to sare-shaam suna hai
duniya abhee badlay gee yeh paighaam suna hai
rastay mai'n jaha'n tehra usee gaam suna hai
milnay ko abhee aur bhee hai kaam suna hai
angaaro'n say khela tha so anjaam yehi tha
jaltay hai'n tere ghar kay dur o baam suna hai
Allah nay is maah kee barkat say nawaaza
bus aa gaya shaitaan ka anjaam suna hai
Islam pay eemaan ko mazboot hee karna
laanay ko shikaari hai'n naya daam suna hai
dekhain to zara kartay hain kiya saamnay aa kar
waisay to yaha'n unka bara naam suna hai
bus aik jo Saaqi nay bachaya hai sabhee say
rakha hai mere wastay woh jaam suna hai

KHAIR
(5th Nov.,2006)

zindagi routine see honay lagee ho bhee gayee
ab jo hai behtar karo kay barh gayee jo bhee gayee
aaj hee taubah karo behtar karo yeh zindagi
phir kaho gay kum milee thee aur woh kho bhee gayee
bhool kay mai'n umr meri dekhta hoo'n aap ko
kiya kahoo'n kitnee bachayee thee nazar to bhee gayee
meri baato'n say bandhee hai uskee saree zindagi
jab kaha to muskaraee jab kaha ro bhee gayee
raasta jaana hai mai'n nay so mujhe roko nahee'n
zindagee to pa lee mai'n nay bhool kay jo bhee gayee
jaagnay ka waqt aaya hai zara takbeer do
uth kay Allahu' kaho kay shaam to ho bhee gayee
Woh jo chahay ga to guzray gee meri bus khair say
shukr hai achee gayee hai khair say jo bhee gayee


INSAAF YA QANOON
(6th Dec.,2006)

kehta hai yeh shaitan bhalaee ko mita do
aurat ko hiya sharm kay rastay say hata do
bakta hai woh shaitan libaas aur karo kum
qanoon banata hai kay akhlaq bhula do
aatee hai sada sun to zara dil ko laga kay
jo sharm ko challenge karay usko saza do
qanoon jo insaaf ko thukranay laga hai
insaaf kay ho jao yaha'n sar bhee laga do
ghairat na ho mardo'n mai'n to aurat hai bigartee
so woh jo kabhee behke usay haath laga do
aansoo say na roshan jo huay khoon bhee doo'n ga
Islam kay rastay ko chiragho'n say saja do



MERA NASEEB

go woh ameer ho gaya haalat ajeeb hai
apna hee dil hai ghair so kaisa ghareeb hai
thoray qadam to leejeye chalna zaroor hai
himmat na haar jayeeyeh manzil qareeb hai
laya hai nakhuda yeh kaha'n kis maqam pur
kashti bhanwar mai'n aa gayee sahil qareeb hai
dil ka koee ho aariza bay-kal nahee'n raho
jo khoob hai mareez to qabil tabeeb hai
yoo'n to kahani chen say sunta raha meri
phir yoo'n kaha so kiya hua banda ajeeb hai
logo'n kee aan baan say maroob nahee'n mai'n
milna mujhe bhee woh hai jo mera naseeb hai

ZARA SOCHAI'N
(16th Dec.,2006)

jabhee sacha'ee ayaa'n ho to banaawat kiya hai
bhala patthar kee jawahir mai'n sajaawat kiya hai
liyay duniya kee talab aap maray jatay hai'n
tere eeman mai'n yeh baasee milaawat kiya hai
abhee jub aap nay duniya ko sabee kuch maana
zara sochai'n to saheeh aur giraawat kiya hai
barhay jaatay hai'n jo taqat kay gumaa'n mai'n aa kar
woh kaha'n jaanai'n kay dil kiya hai lagaawat kiya hai
jabhee itna hee daro ho to yaha'n kyu'n aaye
hawa kay chalnay pay cheekho ho yeh aahat kiya hai
bhala kyoo'n unkay khasaaray ko liye jatay ho
abhee maano jo huee tum say khataa hut kiya hai

AURAT
(24th Dec.,2006)

hargiz tu naachnay kee na gaanay kee cheez hai
aurat usay kahai'n kay chupaanay kee cheez hai
youn hai sabhee ko sharm ka lihaaz pur koee
kehtee hai aap hee say phansaanay kee cheez hai
bahar dikhee woh jeans mai'n chotay kameez mai'n
meri nazar gunah mai'n laanay kee cheez hai
mai'n kya karu'n ruku'n ya mere kaam say barhoo'n
be-sharm raastay say hataanay kee cheez hai
thaama hai jis nay haath zara faisla to kar
tu uski hai ya aik zamanay kee cheez hai

MEHFIL
(12th Jan.,2007)

zara mehfil ko saja do mujhe ghar jana hai
abhee baitha hoo'n zara jum kay magar jana hai
bhalay logo'n kee dua say woh abhee zinda hai
usay aa'mal to kehtay hai'n kay mar jana hai
yu'nhee mehfil say bina poochay chalay aatay hai'n
hamai'n poochai'n to sahee aap agar jana hai
baray aaram say baithay ho saja kar mehfil
kabhee socho to zara tum ko kidhar jana hai
kabhee rato'n ko uttha tha mere dee'n kee khatir
wohee sub haal mujhe aaj bhee kar jana hai
mujhe duniya mai'n abhee aaj sudharna hoga
nahi'n kal ko yeh musafir yeh safar na hoga


GUMAAN

unko yeh gumaa'n tha kay sawaal unka nahi'n hoga
jaisee hai paree un pay khiyaal unka nahi'n hoga
jo husn pay itra kay chalai'n purdah nahi'n chahai'n
go aaj hai kal ko yeh jamaal unka nahi'n hoga
tareekh kay panno'n pay nazar un kee nahi'n jaati
jin ka yeh guma'n hai kay zawaal unka nahi'n hoga
taaqat ka seher ho ya guma'n husn hee ka tehray
maano yeh meri baat kamaal unka nahi'n hoga
chal kay isee rastay pay samajhtay hai'n woh yeh kyoo'nkar
jo inka hua haal woh haal unka nahi'n hoga


LAANAT HO VALENTINE PAY
(Feb. 14, 2007)

dekhay say mere sar ko jhukaati ho jabhee tum
duniya hee badal jaati hai samjho na abhee tum

lillah nigaho'n say gunaho'n mai'n na daalo
kehta hoo'n kay bebaak na ho jaana kabhee tum

duniya ko jabhee chor kay baithoo'n ga tabhee kiya
mano gee meri jaan mere dil ko tabhee tum

mai'n nay jo kee hai chah teri rooh say kee hai
aanchal na mere saamnay sirkaana kabhee tum

kya apni hiya day kay khareedo gee muhabbat
laanat ho valentine pay kho do gee sabhee tum


KIYA KAROO'N
(March 2, 2007)

maahol woh bana hai kay mei'n kaaj kiya karoo'n
be chen ho gaya hoo'n kay mei'n aaj kiya karoo'n
yeh hukm hai mujhe kay nazar ko jhukaayey
jo husn bay hijab hai to laaj kiya karoo'n
jo eetaraz un pay kiya to yeh keh diya
yeh daur hai badal raha samaaj kiya karoo'n
afsos woh jahaan ka andaaz ho gaya
sar aaj mere taaj ho to raaj kiya karoo'n
sub aap lai'n huqooq mere bhee to deejeyay
burqa bura laga hai to chaadar hee leejeyay


HAALAAT
(March 16, 2007)

saaya zameeni haal ka us pay jo parh saka
sacchaee pay raha na bhalee pay arh saka
mein kiya kahoo'n dikhee woh mujhe kis libaas mai'n
afsos kay zameen mai'n bhee mei'n na garh saka
dekha esha pay khoob lara hai woh marz ko
ab yeh khabar nahi'n hai woh ta fajr larh saka
haalaat aisay hai'n kay mei'n hoo'n khauf-zada bhee
tareekh to kahe gee mei'n bawaqt arh saka
Allah kay rastay mai'n qadam aisay jamay hai'n
haalaat go badal gaye mei'n na bigar saka
Alhamdu Lillah


INSAAF
(25th March 2007)
(5th R-Awwal 1428)

kehtay ho sabhee qaum say taqat say laro gay
sacchaee kee hur aik alaamat say laro gay
jin say tumhai'n larna hai laro un say hee ja kay
kiya meri see kamzor sharafat say laro gay
mehroom hain jo bhaee zara unka bhee socho
kamzor say to lartay ho taqat say laro gay
insaaf say lartay ho kay qanoon hay aisa
kiya adl mitaanay ko adalat say laro gay
apnay ko to kanta bhee chubhay cheekhai'n laga do
kiya hum pay kisee aayee naqaahat say laro gay
jub honay lagee fikr kee aazaadee yaha'n par
to kitna abhee aur sadaaqat say laro gay

SEEDHA RASTA
(April 01, 2007)
(Rabi-ul-Awwal 12, 1428)

raahe'n saaree kho gayee'n rasta dikhaaya aap nay
jubkay insaa'n gir gaya tha tubb uthaaya aap nay
gul udaasee mai'n paray thay khaak mai'n kaliya'n sabhee
baagh yeh ujra hua tha phir sajaaya aap nay
jabkay duniya bhoolnay ko thee sabhee sachaee ko
aisay mai'n rasta yeh seedha phir bataaya aap nay
jub yeh tha kay bhens bhee uskee hai laathi jiski hai
naam kamzoro'n ko aisay mai'n dilaaya aap nay
kaash bhoolay dars ko hum yaad kar lei'n taakay phir
aaj woh rasta milay kay jo dikhaaya aap nay


CHIRAAGH
(April 06, 2007)

ho sakay gee aaj duniya phir bhalee tu hai to kiya
ismai'n hee duniya badal dey do gharee tu hai to kiya
jiskee lau say roshnee howay chiragh usko kaho
kiya andhera hai jaha'n mai'n roshnee tu hai to kiya
aaj kee duniya farishto'n hee say behtar aaye gee
teri ab auqaat hee kiya aadmee tu hai to kiya
jub qarar aa hee nahi'n sakta kisi bhee baat say
to ifaaqa bhee na hoga paas hee tu hai to kiya
mei'n nahee'n mayoos rehmat say mere Allah kee
raah niklay gee musalmaa'n wajibee tu hai to kiya

BAAT
(May 02, 2007)

jo aap keh rahe hai'n sabhee baat sunoo'n ga
keh kar zara to dekheiay halaat sunoo'n ga
go kay mujhe yaqeen mere faislay pay hai
lekin yaha'n kuch aap hee say baat sunoo'n ga
aankho'n mai'n aankh daal kay dil kee kahai'n mujhe
bolai'n jo aisay baat sabhee raat sunoo'n ga
aa ja sabhee ko chor bhalaee kay raastay
tu aik meri sun lay teri saat sunoo'n ga
mai'n yoo'n laga hoo'n aaj mananay mai'n Yaar ko
kaisay mai'n Uskee waqte mulaqaat sunoo'n ga

ZAMEEN
(May 25, 2007)

jisko kay maka'n hee say koee gharz nahi'n hai
mai'n khul kay yeh kehta hoo'n kay tu aisa makee'n hai
manay ga bhala kyun kay usay bhee to pata hai
saheb nay zuba'n say jo kaha dil mei'n nahi'n hai
mei'n aur hoo'n tu aur hai woh aur alag hai
pur is ko to chaho kay sabhee kee yeh zamee'n hai
andaaz tanazzul ka pata dey bhee raha hai
tu aap ko samjha hai kay mai'n hoo'n to zamee'n hai
tehrai'n to sahee aap ko chalnay kee paree kyu'n
mai'n nay to abhee aap ko dekha bhee nahi'n hai
Insaaf say khelay ho to insaaf say kehna
pairo'n kay talay kaisay khisaknay ko zamee'n hai

FAISLA
(May 31, 2007)

rangeenio'n ka ho ya saadgee ka faisla
Rub hee na chaahe kiya hai aadmee ka faisla
haalat behtari mai'n aap jaae'n gay sabhee
jo aap kar chukai'n hai'n saadgee ka faisla
ek Rab kay faislay ko maan kar to dekheyay
chorai'n kisi buray kee chaakree ka faisla
mai'n nay jo khel khela aaj khel khel mai'n
ab uskee jeet mai'n hai zindagi ka faisla

KUB TUK
(June 17, 2007)

tum jo bhalee buree kaho saaree sahoo'n ga mai'n
kub tuk tumharay zulm ko sehta rahoo'n ga mai'n
choro kay gir paroo'n ya mere pair pay rahoo'n
kub tuk kisee kay aasray palta rahoo'n ga mai'n
paani ka kaam yeh hai kay behta rahay sada
rokai'n hazar aap to aagay bahoo'n ga mai'n
bus jo lihaaz aap ka karna tha kar liya
bus ab nahi'n kay aap say dil kee kahoo'n ga mai'n
pairo'n mai'n larkarahat hai manzil kay saamnay
chalna mujhe jo aur hai chalta rahoo'n ga mai'n
insha Allah

NEEND
(July 02, 2007)

tu jub aatee hai bahaar aatee hai
liye aankho'n mai'n qaraar aatee hai
jabhee aatee hai meri duniya mai'n
meri hastee ko nikhaar aatee hai
mere khwaab aa kay sajaatee hai tu
aspe baadal pay sawaar aatee hai
aree tu neend andhero'n mei'n bhi
dukhee logo'n ko sahaar aatee hai

MAQAM
(July 06, 2007)

jo adl hee ka daa'ee ho us pay salaam ho
uski rahe gee baat jo dekho ke shaam ho
hargiz na aaj dekhna logo'n mai'n naam ho
leke chalay jo kaam ko dekho wo kaam ho
un ka amal lagaa hai film high noon saa
tanha jo aaj lar maray us pay salaam ho
waali jo shehr ka hai wo kaisa kameen hai
qehere Elahee raaj kay sar pay tamaam ho
aagay shaeed aap ho'n ya haath aa rahai'n
lekin zaroor dekheyay sach-chaee aam ho
sur Hukme Yaar pay jhuke to ye hai zindagi
chaahay kay waqt koee ho koee maqaam ho


TASLEEM KARAI'N
(July 15, 2007)

ghairo'n kee jabhee aap nay jo maan rakhee hai
apno'n hee say larnay kee tabhee thaan rakhee hai
tasleem karai'n aap yeh eeman kee khatir
sach-chaee pay dene keliye jaan rakhee hai
kal aap nay bantee yeh zamee'n aaj dilo'n ko
chadar see mere beech hee mai'n taan rakhee hai
kyu'n aap sikhatay hai'n usee deen kee batai'n
jiskee kay kabhee aik nahi'n maan rakhee hai

BIGARTEE SOCH
(Aug. 02, 2007)

khailnay ko keh raha hai coach ka mai'n kiya karoo'n
pair mai'n girnay say aayee moch ka mai'n kiya karoo'n
aaj to hatho'n mai'n aisa dard hai takleef hai
pair mai'n aayee zara see moch ka mai'n kiya karoo'n
deed pay uskee mere kano'n ko jo mai'n nay choo'aa
wo bharak utthee kay aisee soch ka mai'n kiya karoo'n
aap hee rakhai'n nigaho'n ko zara control mai'n
natural meri kamar kee loch ka mai'n kiya karoo'n
aap se mei'n kiya kahoo'n aisay badaltay haal pay
aap kee aisee bigartee soch ka mai'n kiya karoo'n
aap yeh sochai'n kay marna hai sabhee ko aik din
aap yeh bhulee'n to meri soch ka mai'n kiya karoo'n

JEETA HU'A YEH KHEL
(Aug. 04, 2007)

mu'n pay sabhee laga diya gaara janab nay
kaisa niya sa roop hai dhaara janab nay
mai'n nay tamaam aap ko dekha nahi'n abhee
kaisa chupaaya aap ko saara janab nay
bundooq to janab nay kaandhay laga'ee hai
rakha hu'a hai jaib mai'n aara janab nay
mei'n jo giya to zor mai'n laa ke usay diya
jeeta hu'a jo khel tha haara janab nay

ROSHAN KHIYALEE
(Aug. 14, 2007)

kiya kisee ko maar dena raastee kee baat hai
phir waha'n taali bajaana aadmee kee baat hai
yeh kaha'n say konsee roshan khiyalee aa gayee
kiya kisee ko maar dena roshnee kee baat hai
aaj TV pay koee khatoon yeh kehtee rahee'n
kaunsa kaisa nazaria yeh yunhee kee baat hai
jo ke dil ko bha rahee hai baat wo hai deen kee
jo na dil pay aa sakee wo maulvee kee baat hai
tiragee jo kur gayee roshan khiyalee aap kee
aag yeh keh kur laga dee roshnee kee baat hai
aap kehte hai'n geo phir aap kehte hai'n maro
na du'a na bud-du'a yeh do rukhee kee baat hai
aaj sacha'ee kahe'n ge khauf ho to khauf ho
baat Rub kee ho to kiya phir aadmee kee baat hai
aaj bhee roshan khiyalee aik mera deen hai
mere Rub kee yeh bata'ee zindagee kee baat hai

MERA DEEN
(Aug. 18, 2007)

mere dee'n pur hee abhee jald zamana hoga
abhee duniya kee sunoo'n to yeh rawa na hoga
yaha'n tarjeeh abhee dil ko nahi'n taaqat pay
jama jo deen pay to us pay nishaana hoga
jaha'n kursi ko yeh chore'n to kaho sach'aee
abhee aamil to isee raah zamana hoga
jabhee paye ga kahee'n say yeh nishan-e manzil
tabhee yeh kaarvaa'n aagay ko rawana hoga
aray Islam ko Allah nay izzat dee hai
isay shaitaan mita dey yeh hua na hoga
Al-Hamdu Lillah

ABHI NAHI'N
(Aug. 30, 2007)

rehnay ka dekh lu'n ga sama'n pur abhi nahi'n
khwaishe-dil ko du'n ga zuba'n pur abhi nahi'n
jannat milee to aik haram bhee banawoo'n ga
rakhu'n ga aap ko bhi waha'n pur abhi nahi'n
janu'n ga aap ko mei'n mukammal zara ruke'n
batai'n tamaam ho'n gee aya'n pur abhi nahi'n
Maalik ka shukr hai mei'n kabaa'er mai'n na gira
mei'n bhi karu'n ga aish-e jaha'n pur abhi nahi'n
insha Allah


YEH FAISLA
(Oct. 03, 2007)

barhnay kee jaga aap nay shaitaan ko dee hai
kaisee hai buree baat jo insaan ko dee hai
munsif kee jaga baith kay tum nay yeh kiya kya
dil ko to bachaaya hai saza jaan ko dee hai
yeh log buray log hai'n baantai'n gay bura'ee
izzat nahee'n inn logo'n nay eemaan ko dee hai
aa'ye ga yehee hukm kahee'n aap kay aagay
yeh maar baree qaum kay ehsaan ko dee hai
kiya hosh mai'n kehte ho kay shaitaan ko choro
kiya yeh hai wohee baat jo ramzaan ko dee hai
go adl mai'n kotahee rahee to hai yaha'n pur
yeh faisla laanat hai jo ehsaan ko dee hai


MEHROOMEE
(Oct. 19, 2007)

mehroomio'n mei'n dil pay guzartee hai kiya nahi'n
hastee jo zer-e baar ho kartee hai kiya nahi'n
tum ko khabar bhee hai kay muhabbat hai cheez kiya
miltee hai kum to dil pay guzartee hai kiya nahi'n
tum kis ko keh rahe ho watan say paray raho
tum ko yeh kiya pata ke yeh dhartee hai kiya nahi'n
yeh zindagee to runj o khushee ka milaap hai
daaman pe daagh bhee ho to bhartee hai kiya nahi'n
woh aankh jo roti hai kisee kee bhee maut pay
marnay say aap kay bhee woh dartee hai kiya nahi'n
chaaho tumharee zindagee saree bhalee rahe
maano yeh chah say bhee nikhartee hai kiya nahi'n

ANDAAZ
(Oct. 21, 2007)

tu jo farangiyo'n ka gaata raha taraana
aisay mei'n kiya rahe ga ehsaan ka khazaana
buchpun mai'n kher khubi dekhi yahi'n hai mei'n ne
kitna badal gaya hai burso'n mai'n yeh zamana
tauba tu aaj kur lay kul pay na daal aa'see
nekee ko aaj kur lay aagay ko tu rawaana
dee'n ko sanbhaalna hai dekho na mukhtalif ho
mil kur sabhee raho ke shaitaa'n pe ho nishaana
ooncha bhee hai ammama daarhi bhee kiya baree hai
chehre pay aap ke hai sharmindagee zara na
andaaz-e ghair ghauri ab hai tareeq mera
yane kay woh tajaahul jo kay ho arefaana

RAH-E DAAR
(Nov. 15, 2007)

kaise wo gir chukay kay rahai'n iqtidaar mai'n
zillat qubool kur gaye saaray diyaar mai'n
Allah kee lathee mai'n nahi'n koee sada pur
ja'n kee ama'n mile gee nahi'n uski maar mai'n
jub aa paree hai aaj mere deen o mulk pay
to kiya rakha hai aaj meri jeet haar mai'n
mere qadam lahu lahu bhee ho chukay magar
kantay bicha rahe ho meri rahe- daar mai'n
mehshar mai'n bojh kese uthe ga janab say
duhri kamar to ho gayee yahi'n kay baar mai'n

MASHWARA
(Nov. 26, 2007)

aandheyo'n mai'n aur bhi shamil nahi'n tufaa'n karo
aabroo baqee rahay tum aaj yeh saama'n karo
baat marzi ki hai meri ha'n kahu'n ke na kahu'n
aaj peeche woh para hai na nahi'n tum ha'n karo
qaum kee mushkil barha dee aap apne haath say
phir kaha ke mushkile'n hai'n pesh apnee jaa'n karo
bhoot jo hai laat ka maane ga na wo baat ko
aaj wo jo hai pareshaa'n phir usay haira'n karo
aap ko ye mashwara doo'n ga ke mano deen kee
nek logo'n ko jaha'n ke daawat-e eema'n karo

BAAM SAY
(Dec. 14, 2007)

kaam hee say kaam tehra kiya mujhe hai naam say
mei'n gunaho'n se bachu'n ga jo daru'n anjaam say
aap say ghaltee huee na boliye qismat isay
kiya mile ga aap ko aise khiyaal-e khaam say
pesh apne aap ko sau zaveeyo'n say kar chuki
raqs kee suhrat nay aurat ko giraaya baam say
jub se mei'n ne jaam-e kausar se zara paani liya
kaun kay andaaz mere pe khule hai'n shaam say
aaj Maalik hee nay mere se khareeda hai mujhe
phir mujhe tum kiya khareedo ge kisi bhee daam say

AAKHIR KIYA KARU'N
(Dec. 20, 2007)

koi sunta hi nahi'n hai baat aakhir kiya karu'n
kis tariqay jaa'e gee ye raat aakhir kiya kuru'n
mei'n mere jazbaat say be-kul hua tha raat ko
farz hai shaitaan ko du'n maat aakhir kiya karu'n
lan tanalul bir parhu'n ga mei'n ke pakeeza rahu'n
natawaa'n mei'n aur yeh halaat aakhir kiya karu'n
woh to bud akhlaaq hai mukka dikhata hai mujhe
mei'n bhi ab usko dikha du'n laat aakhir kiya karu'n
maang lee Allah se mei'n nay hiya kee chashnee
ab nahi'n duhrau'n ga ye baat aakhir kiya karu'n

BEDAAR HO RAHAI'N
(Dec. 29, 2007)

kaisee ajeeb raat hai bedaar ho rahai'n
kitni anokhi baat hai bedaar ho rahai'n
go ke lamhaat wo he'n jo aazad ho sake
ye waqt-e hadsaat hai bedaar ho rahai'n
yehi dino'n ke chaar he'n jo auj pe rahe
kaisee siyaasiyaat hai bedaar ho rahai'n
kya hai siyaasiyaat ke mil ke nahi'n raho
balkay ye zaatiyaat hai bedaar ho rahai'n
soey rahe hai'n aap so khirki se jhankeeye
din hai abhee ke raat hai bedaar ho rahai'n

KAISEE SHIKAYATE'N
(Jan. 07, 2008)

taklif biya'n aap yu'n karte hai'n chaar se
jaisay ke jeet aap sakay meri haar se
meri nazar say aap ko kaisee shikaayate'n
dekha jabhi hai aap ko dekha hai pyaar se
Allah pe ab uske bud anjaam ko choro
samjhane se samjhe ga na samjhe ga maar se
insaan ko Allah ne to sharf diya hai
haivaan se aaya hai na aaya hai ghaar se
ghabra nahee'n maa'el ho tu Allah ki janeb
ehsaa'n to sada dhaal he shaitaani waar se

KOSHISH
(Jan. 12, 2008)

naaza'n raha ghuroor se tere gumaa'n pe tu
dushman se baat koi kabhi kee na du-ba-du
nakhra bigaarta hai so roko jo ho sakay
us pe nazar khiyaal ya rato'n ki guftugu
nekee asar dikhaatee hai poore jahaan mai'n
khusbu chaman ki phailti hai jaise ku-ba-ku
koshish karai'n to paae'n ge aisay maqaam ko
chahe'n ge wo bhee aap se ho jae'n hu-ba-hu
maloom to mujhe he wo rasta na pa'e ga
lekin jigar mei'n aaj karoo'n ga lahu lahu
wohi jiya jo zindagi ko deen pay jiya
jub ho isi pe maut pe marne ki aarzu

KUCH AISE LOG
(Ashura, Jan. 20, 2008)

deen kee sunte sunate hai'n kuch aise log hai'n
jo suku'n aise hee paate hai'n kuch aise log hai'n
aaj Moosa Nooh nay jis ko bachaaya tha kabhee
deen wohi wo bachate hai'n kuch aise log hai'n
piyaas mai'n duniya ka paani jo kabhee na mil sake
aab-e kausar se bujhaate hai'n kuch aise log hai'n
zindagee saaree kee saree nekiyo'n hee mai'n rahee
dhundte hai'n jo wo paate hai'n kuch aise log hai'n
phir yazeedee taur waale aa gaye hai'n raaj pe
phir mujhe wo yaad aate hai'n kuch aise log hai'n

ZEHNI GHULAAM
(Feb. 14, 2008)

wo naach yu'n rahee hai'n ke zehni ghulaam hai'n
ghairo'n kee naql ke ye sabhee ehtemaam hai'n
mei'n unkee asl khub samajhta hu'n kiya kahu'n
chere se kiya haseen hai'n wo khush kalaam hai'n
kiya aurto'n ke fashiono'n mai'n husn he koi
kiya naach khel raqs muhabbat kay naam hai'n
tehreer ashk say jo ho sake ya khoon say
zartaar aaj wohee faislay tamaam hai'n
kaisay kabhee sudhar sakay ga aap se jaha'n
bigray huay jo aap hee ke saaray kaam hai'n
makhloot mehfilo'n pe mere Rub ki laanate'n
bud hai'n tamaam wohi jo ke nek naam hai'n

NEKIYA'N
(Feb. 28, 2008)

tu nazar mai'n hai sabhi kee aik yehi kaam kar
muskara ke dekh bhai nekiyoo'n ko aam kar
phir subuh hone lagi hai chal namaze fajr pe
phir chale'n rakhte safar ab haath hee mai'n thaam kar
jo sahar ho zindagi kee raaste mai'n ho rahay
aik yehi raastay mai'n zindagi kee shaam kar
tu sabhi sunta hai meri daasta'n ko chor ke
ja mere say dour hee ja aur koee kaam kar
kamtaree tasleem hai tu aik meri maan le
chor ke saari buraee nekiyoo'n mai'n naam kar

SACHA'EE SE
(March 11, 2008)

insaaf kee jo baat hai sach'ee se kahu'n
kehna jo hai to adl ke shaida'ee se kahu'n
mushkil paree hai aap ko to yaad kar liya
socha kabhee qaraar hai to bha'ee se kahu'n
maternity mai'n sharm jo baaqi na reh sake
behtar hai apna dard kisi da'ee se kahu'n
dekho na ghoor ke meri sacha'ee pe mujhe
hairaa'n ho saadgee pe to shena'ee se kahu'n
be chain ho rahe ho mere jis khiyaal se
laazim hai dil ki aur bhee gehra'ee se kahu'n

KHAIR SE
(March 14, 2008)

Allah nay kitna diya jholi mai'n khair se
mai'n kyu'n biku'n ga aap kee boli mai'n khair se
choori pehen ke aap ne mehndi jo thop lee
london mai'n chor aate hai'n doli mai'n khair se
roshan khiyal ho ke na mehlo'n mai'n pa sake
jo tha sukoon taat kee kholi mai'n khair se
kashkol phir liya hai ke mangu hai'n nasl ke
go ke arab rupay mile jholi mai'n khair se
panchi akela baitha hai tooti see daal pe
kul jo dikha uraan mai'n toli mai'n khair se
jub ke bina-e aariza tera hee qalb hai
tu kiya shifa ko paa'e ga goli mai'n khair se

NABI KEE RAAH
(Night of March 20, 2008)
(My Birthday & 12 R-Awwal)

dil mai'n uthee hai tees dawa'ee to leejiye
us rehnuma kee raah numa'ee to leejiye
melaad mil gayee hai meri saalgirah pe
goya yeh saal aur bhala'ee to leejiye
dikhne lagi hai roshni manzil ki yahi'n se
nekee talak huee hai rasa'ee to leejiye
dil ki dhula'ee hum ko sikha'ee hai aap ne
raahe nabi se dil kee safa'ee to leejiye
manzil nabi ke raah mai'n pae'n ge aaj bhee
bus aap unkee thaam kala'ee to leejiye

TAUQEER
(March 24, 2008)

kaise wo uthaate hai'n ke jo baar paray hai'n
hum hijr hee mai'n aap ke bezaar paray hai'n
mai'n seh to gaya hu'n sabhee takleef ko lekin
reh reh ke mere dil pe naye waar paray hai'n
rutba jo khawateen ka pehchana nahi'n hai
mushkil mai'n isi waaste sarkaar paray hai'n
tauqeer jo na payee to kaisee hai shikaayat
mere se jo behtar he'n wo bekaar paray hai'n
thukraya tha jin logo'n ko aaj unke galo'n mai'n
be daagh gulo'n hee ke hasee'n haar paray hai'n
go jheel ke aaya hu'n kinaaray pe safar mai'n
malum hai ke khwaab mere paar paray hai'n

TAUBA
(April 06, 2008)

duniya hai yaha'n soz kabhi saaz rahe ga
behtar hai buray taur se jo baaz rahe ga
nekee kee taraf aap ka dil ho gaya mae'l
maazi mei'n bura jo bhi hua raaz rahe ga
duniya se kabhi jana hai marna to kabhi hai
aise hee sabhee yu'nhee para naaz rahe ga
hum ko to zaroorat ka mile yeh bhee buhat hai
teri tu samajh apna yeh andaaz rahe ga
tauba sabhee aamaal-e qabeeha se bachu'n ga
Allah nay chaha to kabeera se bachu'n ga

HAADEE KEE AZAA'N
(May 01, 2008)

chalta hee rahu'n ga so ayaa'n hoga zama'n pur
hargiz na ruku'n ga jo na puhunchu'n ga maka'n pur
mehdi to jabhi aaye'n ge badlay ga jaha'n pur
duniya ko jagaate raho haadee kee azaa'n pur
baatil ka gumaa'n hai ke hu'n maazi ki sada mei'n
ibhaam khiyalo'n ka usay laaya kaha'n pur
mei'n uskay khiyaalo'n ka bura kahe ko manu'n
aiso'n keleeye waqt nahi'n hum ko yaha'n pur
chaadar mai'n dikhee aaj wo jo mod kabhee thee
mei'n apnee nigaaho'n ko jhuka'un ga yaha'n pur
tu aap hila dey ga jaha'n hausla karna
Islam kee baato'n ko biya'n kar dey jaha'n pur

ACCHA HAI
(May 05, 2008)

mere se dour chalee ja'o abhee acha hai
rahu'n aankho'n ka nigehbaan tabhee acha hai
mere jazbaat ko focus jo kiya tha mei'n nay
abhi ja'ey to woh le ja'ey sabhee achcha hai
teri khami jo bata'ey so bura woh tehrey
teri tareef keeye ja'ey tabhee acha hai
usay bud aap ne muhtaaji mai'n tehraaya tha
abhee daulat woh kama baitha abhee acha hai
nahi'n ghurbat hai buri bud hai to mehrumi hai
nabi ka jo hai tareeqa wo sabhee acha hai

THEEK HAI
(May 22, 2008)

khol ke sacha'ee ko tu keh sake to theek hai
baat jo kum-zaat ki ho seh sake to theek hai
qaum ka jo dard bhi hai chup raho is daur mai'n
zulm ko jo zulm hee na keh sake to theek hai
kaunsee janeb chalee hai qaum kee kashti bhala
dubti kashti mai'n jo tu beh sake to theek hai
aaj duniya saath hee ley ya saja kay chor dey
theek woh eemaan pe jo reh sake to theek hai

ROYA ZAROOR HAI
(June 12, 2008)

woh raat aansu'on hi mai'n soya zaroor hai
us nay sabhi gunaho'n ko dhoya zaroor hai
aaya hai raaste pe jabhee umr ho gayee
ehsaas hai usay bhi so roya zaroor hai
pae'n ge wohi phal ke yaha'n pur jo bo sake
hur aik hee ne paaya jo boya zaroor hai
nekee ke raaste pey raho Rub ki yaad mai'n
Rehmat Usee kee raah mai'n goya zaroor hai

NAAK SE AAGAY
(July 02, 2008)

takleef na kum hogee zamanay ko bata kay
tum ko bhee rula du'n ga jigar apna dikha kay
aaya mei'n jaha'n mai'n to bara shor machaya
lekin mei'n nahi'n jau'n ga duniya ko bata kay
nafrat abhee chahu'n bhi agar ho na sake gee
baitha hu'n bari umr muhabbat mai'n luta kay
gardish mai'n zami'n jo he to gardish mai'n rahe gi
insaa'n nahi'n hoga karo atom kay dhama-kay
dekha hee nahi'n jis ne kabhee naak se aagay
tum ko woh kaha'n de ga kahi'n ghar ko basa kay
duniya say kisi gharz mai'n milnay nahi'n aaya
aagay mai'n chala jaoo'n ga duniya ko saja kay

TEHER KE
(July 21,2008)

zindagee jo gaa rahee hai teher ke dekhe'n zara
khel jo dikhla rahee hai teher ke dekhe'n zara
hur zara see der mai'n duniya badal jane lagee
phir badalne jaa rahee hai teher ke dekhe'n zara
aap mere haal ko aise nahi'n na dekheyay
zindagee jo paa rahee hai teher ke dekhe'n zara
saamne toofa'n nazar aane laga hai leher mai'n
naa'o chaltee jaa rahee hai teher ke dekhe'n zara
roshni kee baat kee pur wehshato'n mai'n le gaye
teeragee see chaa rahee hai teher ke dekhe'n zara
aap kee wo muskaraahat bhee rulaati hai mujhe
hont pe jo aa rahee hai teher ke dekhe'n zara
aaj meri mushkelo'n pe shauq se hanste rahe'n
raat aage jaa rahee hai teher ke dekhe'n zara

DAKU YA CHOR
(Aug. 15, 2008)

milne laga hai aaj yeh paighaam dekheye
sayyaad le ke aa gaye hai'n daam dekheye
kehte hai'n chah kejeeye daku ya chor kee
ab kiya karu'n ajeeb hai ye kaam dekheye
mai'n ne jo yeh kaha ke shehr chor deejiye
duniya hee se chalay gaye anjaam dekheye
kehte thay hum ko sust wo bethe hai'n phel ke
hota nahi'n hai un se ko'ee kaam dekheye
daku ko shor kur ke bhagaya hai chor ne
dhalne pe rung la'e gee yeh shaam dekheye
rassi ko Rub kee chorne se ye bigaar hai
bigree bane gee aaj is ko thaam dekheye

BAARHA
(Aug. 23, 2008)

mai'n kahu'n ga deen ki batai'n nagar mai'n baarha
jo izaafa ho saka mere asar mai'n baarha
kyu'n musafir be-kalee mehsoos na karne lagay
jub chale manzil pe laute wo safar mai'n baarha
khair hai ke aansuo'n ko zabt karna aa gaya
go abhi bhi dard hota hai jigar mai'n baarha
shukr hai Allah ne rehm o karam se khair kee
hai mujhe maloom aaya hu'n nazar mai'n baarha
dekhte hai'n kya asar he phoonk mai'n sarkaar ki
hum chiraagho'n ko jala'en ge safar mai'n baarha
baat kehne se sukoo'n aata nahi'n hai kya karu'n
keh chuka hu'n sher mai'n baaqi nasar mai'n baarha
aaj bhee Allah kay fazl o karam se khair hai
dosto'n ne go kiya ruswa nagar mai'n baarha

BARSO'N SE
(Oct. 17, 2008)

kisi rastay pe kabhi aap buray na jaana
ko'ee jalta ho jale khoob jale na jaana
mujhe taklif bataate nahi'n tum kuyu'n apnee
mujhe auro'n hee sa jaana to mujhe na jaana
bhale kirdaar kee ta'reef karo tum lekin
kabhi taaqat pe ya daulat pe jhuke na jaana
meri soche'n mere andaaz khata tehray hai'n
tere barso'n se raha paas tujhe na jaana

CHEIN SE
(Nov. 10, 2008)

hur tareh kee mushkilo'n mai'n bhee raha hu'n chein se
hur tareh ke zakhm ko mei'n see raha hu'n chein se
shukr hai Quran ko barso'n se parhta hee raha
mei'n usee ko thamnay se hee raha hu'n chein se
bus Nabi ke raastay mai'n koshishe'n apnee rakhee'n
mei'n yahi'n pe Aab-e Kausar pee raha hu'n chein se
jo tawajju apne Rub ki samt mei'n ne mor lee
tub se apnee zindagi ko jee raha hu'n chein se
Al-Hamdu Lillah


ROOH KO BHI
(Nov.30, 2008)
(Zilhaj 01, 1429)

paray koee mushkil guzaara karai'n
muhabbat se Rub ko pukaara karai'n
sajaaya hasee'n roop ko aap ne
zara rooh ko bhi nikhaara karai'n
jabhee aap ne bhi nazar pher lee
tabhee kiya kisi ka sahaara karai'n
cholestrol se aaj purhaiz ho
gunaho'n se hur dum kinaara karai'n
usay kaam hee se nahi'n fursate'n
wo kuyu'n zikr aakhir hamaara karai'n

ISHAARAY
(4th Jan., 2009)

dekheye ke khaatmay ke sub ishaaray aa gaye
jo kitabo'n mai'n likhay thay aaj saaray aa gaye
ab qeher aa jaey ga ya phir sakinat aaye gee
istareh ke aasmaa'n se ab ishaaray aa gaye
baagh mai'n sarkaar hee sulga rahe thay aag phir
ab gila kaisa ke daala'n tuk sharaaray aa gaye
unki aamad pe bhee mere mu'n pe hoga marhaba
jo kay dee'n ke raastay pe bin pukaaray aa gaye
ghar mera roshan hua hai deen kee sach'aee se
justuju mai'n jo rahe thay aaj saaray aa gaye

PUR-AZM
(8th Jan., 2009-ASHURA)

jo na tareekeyo'n se ho'n kabhi darnay waalay
wohee hotay hai'n waha'n roshni karnay waalay
wo jo sach'ai ke rastay mai'n nazar aatay hai'n
baray pur-azm hai'n saaray wo guzarne waalay
kahay dete hai'n yazeedo'n se bina ghabra'ey
nahi'n hum karb-o-bala se hain bikharnay waalay
mujhe is raah mai'n aksar yeh sada aati hai
kabhi marte nahi'n is raah mai'n marnay waalay

UBHAR SAKTA HAI
(Feb. 14, 2009)

tu agar deen ka ho ja'ey nikhar sakta hai
bari pasti se nikal ke bhi ubhar sakta hai
abhi tu barh ke zara deen ka saaya kar le
jise saaya na muassar ho bikhar sakta hai
yaha'n jub aaya hai tu sard o garam ko seh kar
abhi kanto'n se bhi aagay tu guzar sakta hai
tu jo maghrib se paray ho teri nusrat keleye
yaha'n lashkar bhi farishto'n ka utar sakta hai

DAAR-E IMTEHAA'N
(Mar. 08, 2009)

yeh ghaur bhi kabhi kar kaisa guzar yaha'n hai
neki ko dekh na kay kitnay ka zar yaha'n hai
go moulvee bara ho darwaish ho ya sufi
jo haal ho waha'n pe kis ko khabar yaha'n hai
nikle ho tum safar mai'n phir yeh qaraar kaisa
kyun jee rahe ho aise jaise ke ghar yaha'n hai
ye daar-e imtehaa'n hai wo daar hai jaza ka
ghar to mera wahee'n hai go uska dar yaha'n hai
hur cheez ko rakha hai mei'n ne jaga pe uski
manzil meri waha'n hai mera safar yaha'n hai
jo meherbaan tu hai mere pe mere Maalik
so jee raha hu'n kyunke Teri Nazar yaha'n hai

ZINDAGANI BUN GAYEE
(April 05, 2009)

jo badal ke nekiyo'n ki wo nishaani bun gayee
zindagi ghum ke baja'e shaadmaani bun gayee
khoob aata hai usay bhi zindagi ko thaamna
dhoop us pe jo pari to barf paani bun gayee
mashwaray mei'n ne diye to aap kyu'n be-kul huay
dekheye baithe bitha'ey bus kahaani bun gayee
zindagee bantee nahee'n hai maal kee buhtaat se
naam jannat mai'n mile to zindagaani bun gayee
rooh ko behtar karai'n ke zindagi pe keh sakai'n
go guzaari hai zamee'n pur aasmaani bun gayee

SAAHIL KAHE MUJHE
(April 11, 2009)

jee mai'n hai raahe fikr pe aamil kahe mujhe
saara jaha'n bhala'ee ka qaa'el kahe mujhe
mei'n jo kahun to mor le tufa'n bhi raasta
sonaamio'n kee leher bhi saahil kahe mujhe
insaaf ke raste pe rahu'n aur you'n rahu'n
dushman agarchay sakht ho aadil kahe mujhe
uski rumuze guft kee jub se khabar mili
ab intizaar khoob hai qaatil kahe mujhe
jub is pareshaa'n qaum ko rasta na mil sake
aisay mai'n aitebaar ke qaabil kahe mujhe
jo izn ho Allah ka dunya ko badal du'n
barso'n ke intezaar ka haasil kahe mujhe
meri du'a yeh hai ke farishtay ko hukm ho
neki mai'n wo tamaam ki shaamil kahe mujhe
Ameen

KAISE BACHO GE
(April 23, 2009)

Allah ko chaho to gunaaho'n se bacho ge
dunya mai'n bare hone kee chaaho'n se bacho ge
mei'n ne ye suna to hai magar mei'n nahi'n kehta
aurat se bacho ge to gunaho'n se bacho ge
makhloot ye ilmi ye ilaajo'n ke idaaray
kya aise hi shaitaan ki raaho'n se bacho ge
be-sharm bane aap nigaho'n ko bacha ke
Allah ki na aap nigaho'n se bacho ge
zaalim jo sitam karte ho tum pur hee pare ga
kub tuk kisi mazloom ki aaho'n se bacho ge
mei'n tum se ye kehta hu'n abhi kaise bacho ge
Allah se tauba jo karo aise bacho ge

KUCH AUR BHI
(May 25, 2009)

zindagi to hai magar kuch aur bhi to chaeeye
zindagi ko dhaalnay ka taur bhi to chaeeye
aap kehte jo hai'n usko phir bhulate aap hai'n
aap ne kee baat us pe ghaur bhi to chaeeye
mushkilo'n se paar ho ke manzilo'n ko pa'o ge
ab yaha'n pe khatima-e jaur bhi to chaeeye
baatini tabdeelyo'n se waqt behtar aaye ga
zaahiri andaaz pe woh daur bhi to chaeeye

TALEEM NE
(June 07, 2009)

wo sabr wo samaaj hee ko cheen liya hai
kis ne mere mizaaj hee ko cheen liya hai
go maghribi taleem kaho khoob hai is ne
kitno'n ki rahi laaj hee ko cheen liya hai
saffaki sikahate he'n kuch apne hee madaris
nadaanio'n ne raaj hee ko cheen liya hai
dushman ne mere khauf se barso'n jo diya hai
susti ne wohi baaj hee ko cheen liya hai
kehta tha tere kul ko saja du'n ga meri sun
tu ne to mere aaj hee ko cheen liya hai

AAKHRI BAAT
(July 05, 2009)

Allah kee rassi ko zara thaam yaha'n pur
dunia se jabhi jaey rahe naam yaha'n pur
dekhu'n to sahi subhu se jo kuch bhi kiya hai
tehre jo mere waaste ye shaam yaha'n pur
Allah se meri ye dua hai ke usee kee
bato'n ko kahu'n yehi rahe kaam yaha'n pur
Allah ne jo deen ata hum ko kiya hai
jo kaam koee hai to karo aam yaha'n pur
go ke mere ashaar yaha'n khatm karu'n ga
albatta abhi khatm nahi'n kaam yaha'n pur


Note: Today (July 05, 2009), I have ended writing my verses "Chat Ki Shaery" but insha Allah I would go on writing Shaery as time permits and conveying all good morals. May Allah give me Taufiq for all good efforts in HIS way and make me a guidance for all peoples that read my writings.

AL-HAMDU-LILLAH

by
Muhammad Saleem Dada
e-mail: saleemdada@yahoo.com

Dada's Writings at Weebly

Teachings on MUQABILA
Islamic Concepts in Urdu

Towards Islam through Observation
Suicidal Tendency in Natal Charts
Prehistory-A Misleading Notion
Basic Physiology
Islamic Concepts
Islamic Concept of Motivation
An Insight into the Western Psyche


Hosting by WebRing.